(ସ୍ୱର : ଦୟାମୟ ଯୀଶୁ ଧନ ହେ)
ଦୟାମୟ ଯୀଶୁ ପ୍ରିୟ ହେ ମୋର ସବୁ କିଛି ତୁମେ ନିଅ । ଘୋଷା ।
ନିଅ ବୋଲି ପ୍ରଭୁ ଦେଲି ମୁହିଁ ତୋଳି
ଅତୀତ ଜୀବନ ଶତ ବ୍ୟଥା କାଳି; ଲହୁ ଲୁହେ ଧୋଇ ଦିଅ ପ୍ରେମମୟ
ତୁମ ଯୋଗ୍ୟ କରି ନିଅ ହେ । ୧ ।
କ୍ରୁଶ କୋରଡ଼ାରେ ଦିଅ ଭାଙ୍ଗି ଦିଅ ସଂସାରର ଶତ ବାସନାର ମୋହ,
ନାହିଁ ମୋର ଶକ୍ତି ଟାଣେ ଜଗତ୍ପତି
ତୁମ ଶକ୍ତି ମୋତେ ଦିଅ ହେ । ୨ ।
ଲାଜ, ଅପମାନ, ଯଶ, ସନମାନ
ତୁମ ପ୍ରେମେ ଯେହ୍ନେ ହୁଏ ଗୋ ସମାନ
କାଲବେରୀ ସ୍ରୋତ ପ୍ରେମର ସଙ୍ଗୀତ ବୁକୁ ତଳେ ମୋର ଦିଅ ହେ । ୩ ।
ଗର୍ବ ଦମ୍ଭ ମୋର ସବୁ କରି ଚୂର୍ଣ୍ଣ
ନିଅ ତୁମେ ମୋର ଭଙ୍ଗା ଚୂନା ମନ
ତୁମରି ବାସନା ପୁରାଇ ଜୀବନେ ସଦା ମୋର ପାଶେ ଥାଅ ହେ । ୪ ।
