ହିନ୍ଦୁଙ୍କ ଦେଶରେ ଖ୍ରୀଷ୍ଟିୟାନ ପାଇଁ ଦିନ ଟିଏ

କଣ କହିଲେ ଆଜ୍ଞା ! ଜୁଲାଇ ୩ ତାରିଖ I ଭାରତୀୟ ଖ୍ରୀଷ୍ଟିୟାନ ଦିବସ I ବିଶ୍ୱାସ ବି କରି ହେଉନି I ବଡ଼ଦିନ , ଶୁଭ ଶୁକ୍ରବାର , ପୁନରୁଥାନ ଦିବସ କଥା ଜାଣିଥିଲୁ I କିନ୍ତୁ ଖ୍ରୀଷ୍ଟିୟାନ ଦିବସ ଯେ ଭାରତରେ ପାଳନ ହେବ ତାହା ଜାଣି ନ ଥିଲୁ I ଲାଗି ପଡ଼ି ଆମ ଲୋକ କରିଦେଲେ ନା I ଖାଲି କଣ ଯୋଗ ଦିବସ , ଶ୍ରମ ଦିବସ , ହିନ୍ଦୀ ଦିବସ ପାଳନ ହେବ ଭାରତରେ I କାହିଁକି ଖ୍ରୀଷ୍ଟିୟାନ ଦିବସ ପାଳନ ହେବ ନାହିଁ ଯେ ଭାରତରେ !

ଭାରତୀୟ ବୋଲି କାହିଁ କେତେ ଯେ ଗର୍ବ ଆମ ମନରେ I ଅଧିକ ଗର୍ବ ଲାଗୁଛି ଆମେ ଭାରତୀୟ ଖ୍ରୀଷ୍ଟିୟାନ ବୋଲି I ଭାରତ ଏମିତି ସେମିତି ଦେଶ ନାହିଁ ମ ! ଯୀଶୁଙ୍କ ଶିଷ୍ୟ ଥୋମା ଆମ ଦେଶକୁ ଆସିଥିଲେ I କିଛି ନ ଦେଖି ବିଶ୍ୱାସ କରିବାର ଲୋକ ସେ ନ ଥିଲେ I ପିତରଙ୍କ ଭଳି ଟିକେ ଆଗବଢି କହିବାର ଲୋକ ସେ ନ ଥିଲେ ସତ l କିନ୍ତୁ ସତ କୁ ଜାଣିବାର ଆଗ୍ରହ ଥିଲା ତାଙ୍କର l ପୁନରୁଥିତ ଯୀଶୁଙ୍କୁ ଦେଖି ବିଶ୍ୱାସ ତାଙ୍କ ବଢି ଯାଇଥିଲା I ଯୀଶୁଙ୍କ ସେବା କୁ ନେଇ ପହଞ୍ଚି ଥିଲେ ଭାରତକୁ I ସେବା କରୁ କରୁ ମୃତ୍ୟୁ ବରଣ ମଧ୍ୟ କଲେ ଭାରତରେ I କି ଭାଗ୍ୟ ସତରେ ଆମର I ଯୀଶୁଙ୍କ ଶିଷ୍ୟ ଥୋମାଙ୍କ ପାଦ ଆମ ଦେଶରେ ପଡିଛି I ଆଜି ବି ଅନେକ ଦେଶ ଅଛି ସେମାନଙ୍କର ଏଭଳି ସୌଭାଗ୍ୟ ଜୁଟି ନାହିଁ I ଏମିତି ବାଇବଲରେ ଭାରତ ର ବି ନାମ ଅଛି I ଯୀଶୁଙ୍କ ସେବାକାର୍ଯ୍ୟ ଓ ପୁରାତନ ନିୟମ ସହିତ ଆମ ଦେଶ ଭାରତର ଭାରୀ ସମ୍ପର୍କ ରହିଛି I ତଥାପି ଆମେ ଆଜି ସଂଖ୍ୟାଲଘୁ l

ଦେଶ ସ୍ୱାଧିନତାରେ କଣ ଭାରତୀୟ ଖ୍ରୀଷ୍ଟିୟାନ ନ ଥିଲେ I ଖାଲି ହିନ୍ଦୁ , ମୁସଲମାନ ଆଉ ଶିଖ ଭାଇମାନେ ଥିଲେ I ନାହିଁ ମ I ଆମ ଖ୍ରୀଷ୍ଟିୟାନ ଭାଇ ଭଉଣୀମାନେ ମଧ୍ୟ ସ୍ୱାଧୀନତା ଆନ୍ଦୋଳନ ପାଇଁ ବାହାରି ଆସିଥିଲେ I ପରିବାରକୁ ଛାଡି ଦେଶ କୁ ରକ୍ଷା କରିବାକୁ ଆଗଭର ଥିଲେ I ସ୍ବଦେଶୀ ଆନ୍ଦୋଳନ ପାଇଁ ବର୍ମାବାନ୍ଧବ ଉପାଧ୍ୟୟକୁ କିଏ ନ ଜାଣେ I ପୁଲଲି ଚାକୋ କେରଳ ରାଜ୍ୟର ସ୍ୱାଧୀନତା ସଂଗ୍ରାମୀ ଥିଲେ I କାଳି ଚରଣ ବାନାର୍ଜୀ ଇଷ୍ଟ ଇଣ୍ଡିଆ କମ୍ପାନୀ ବିରୁଦ୍ଧରେ ସ୍ୱର ଉଠାଇଥିଲେ I ଏମାନେ ସବୁ ସଚ୍ଚା ଖ୍ରୀଷ୍ଟିୟାନ ଥିଲେ I ଦେଶ ମାତୃକାର ସେବାପାଇଁ ସେମାନେ ବାହାରି ଆସିଥିଲେ I ସେମାନଙ୍କ ଉତ୍ସର୍ଗିକୃତ ଜୀବନ ଭାରତୀୟ ଭୁଲିଯିବା ଦରକାର କି ! ଆଜି ବି ଖ୍ରୀଷ୍ଟିୟାନ ଭାଇମାନଙ୍କୁ ଦେଶର ସୈନ୍ୟ ବିଭାଗରେ ଦେଖିବାକୁ ମିଳୁଛି I ଦେଶର ସୁରକ୍ଷା କରୁଛନ୍ତି I ଏପରିକି ଦେଶ ପାଇଁ ସହିଦ ହେବା କଥା ମଧ୍ୟ ନଜର ଅଛି I ଯେଉଁ ମାନେ ଆମ ଧର୍ମ ହିଁ ଚାଲିବ ଭାରତରେ I ଅନ୍ୟ ଧର୍ମ ବିଦେଶୀ ଧର୍ମ ବୋଲି କହୁଛନ୍ତି ଆଉ ଅଡ଼ି ବସୁଛନ୍ତି I ସେମାନେ କଣ ଏହା ବୁଝିପାରିବେ ! ତୁମେ ଖାଲି କଣ ସ୍ୱାଧୀନତା ଆଣିଦେଲ l ଆମ ଲୋକ ଆଉ କିଛି କରୁ ନ ଥିଲେ କି l ଇତିହାସ ଟିକେ ପଢ଼ l ଆମ ଲୋକ ଙ୍କ ବଳିଦାନ କଥା ଜାଣି ପାରିବ ଭଲରେ l

ଦେଶରେ ଶିକ୍ଷା ବ୍ୟବସ୍ଥାକୁ ସୁଦୃଢ କରିବାରେ ଖ୍ରୀଷ୍ଟିୟାନ ସ୍କୁଲ ଏବଂ କଲେଜ ର ଚାହିଦା କାହିଁ ରେ କଣ ! ସେହି ଅନୁଷ୍ଠାନ କାହି କେତେ ଡ଼ାକ୍ତର , ଇଞ୍ଜିନିଅର , ଆଇଏସ , ଓଏସ , ଖେଳାଳୀ ମାନଙ୍କୁ ଦେଶ ପାଇଁ ତିଆରି କରିଛି ତାର ହିସାବ କଲେ ସରିବ ନାହିଁ I ଆଜି ଯେଉଁମାନେ ଦେଶର ବଡ଼ ବଡ଼ ସ୍ଥାନରେ ଅଛନ୍ତି ସେମାନେ ଵି ଦିନେ ଆମ ଖ୍ରୀଷ୍ଟିୟାନ ସ୍କୁଲ ଆଉ କଲେଜ ରେ ପଢ଼ିଥିଲେ I ବିଜେପିର ନେତା ଏଲ. କେ. ଆଡଭାନୀ କୁ କିଏ ନ ଜାଣେ ! କଂଗ୍ରେସ ର ନେତା ଶଶୀ ଥରୁର ର ଭାଷଣ ଯିଏ ଶୁଣୁଛି ସେ ଆଶ୍ଚଯ୍ୟ ହୋଇ ଯାଉଛି I କି ଭାଷାର ଜ୍ଞାନ ତାଙ୍କ ପାଖରେ ଅଛି ! ଥରେ ଶୁଣିଲେ ଦୁଇଥର ଶୁଣିବାକୁ ତାଙ୍କ ଭାଷଣ ଇଛା ହେଉଛି I ଏମାନେ ବି ଦିନେ ଆମ ଖ୍ରୀଷ୍ଟିୟାନ ସ୍କୁଲ ଆଉ କଲେଜ ରେ ପଢୁଥିଲେ I ଯେଉଁ ଠାରୁ ସେମାନେ ଉତ୍ପନ ସେମାନେ କେମିତି ଭୁଲି ପାରିବେ ତାକୁ ! ସେମାନଙ୍କୁ ବଡ଼ କରିବାରେ ଆମ ଖ୍ରୀଷ୍ଟିୟାନ ସ୍କୁଲ ଆଉ କଲେଜରେ ହାତ ଅଛି I

ଭାରତ ସରକାର ଖ୍ରୀଷ୍ଟିୟାନ ମାନଙ୍କ କାର୍ଯ୍ୟ କୁ ଦେଖିଛନ୍ତି I ପ୍ରଂଶସା ମଧ୍ୟ କରିଛନ୍ତି I ସେଣ୍ଟ ଥୋମାସ ଙ୍କ ନାମରେ ଡାକ ଟିକଟ ପ୍ରଚଳନ କରିଛନ୍ତି I ଉଇଲିୟମ କେରୀ, ସେଣ୍ଟ ଫ୍ରାନ୍ସିସ ଜାଭିଏରଙ୍କ ନାମରେ ମଧ୍ୟ ଡାକ ଟିକଟ ପ୍ରଚଳନ ହୋଇଛି I ସେବାର କାର୍ଯ୍ୟ ପାଇଁ ଭାରତରତ୍ନ ଉପାଧିରେ ମଦର ଟେରେସାଙ୍କୁ ମଧ୍ୟ ସମ୍ମାନିତ କରିଛନ୍ତି I ଭାରି ଉତ୍ତମ କଥା l ଆଜି ବି ରାସ୍ତା , ଛକ , ବିଲଡିଂ , ସହର ର ନାମ କରଣ କରାଯାଉଛି I ପୁରୁଣା ନାମକୁ ପରିବର୍ତ୍ତନ କରି ନୂଆ ନାମ ଦିଆଯାଉଛି I କିନ୍ତୁ ଆମ ଖ୍ରୀଷ୍ଟିୟାନ ଲୋକମାନଙ୍କ ନାମ ଆଗକୁ ଆସିପାରୁନି I ଲାଗୁଛି ଏହି ନାମକରଣ ପଛରେ ଏକ ସ୍ୱାର୍ଥବାଦୀ ଗୋଷ୍ଠୀ କାମ କରୁଛି I ଖ୍ରୀଷ୍ଟିୟାନ ମାନଙ୍କ କାମକୁ ତାଙ୍କର ଆଖିକୁ ବୋଧେ ଦେଖାଯାଉନି I ପୋଜିସନ ମାୟାରେ ବାୟା ହୋଇ ଯାହା ଚାହିଁଲେ ତାହା କରି ଦେଉଛନ୍ତି I ସମୟ ଆସୁ ଖ୍ରୀଷ୍ଟିୟାନ ମାନଙ୍କ ନାମ ଗ୍ରାମ , ସହର , ଛକ , ରାସ୍ତା , ବିଲଡିଂରେ ସ୍ଥାନ ପାଉ I

ମାର୍ଟିନ ଲୁଥର କିଙ୍ଗ କହିଲେ ଆମକୁ ମିଳିତ ହୋଇ ରହିବାକୁ ପଡିବ I ନଚେତ ଆମେ ଧ୍ୱଂସ ହୋଇଯିବା I ସତକଥା I ଆମେ ଭାରତୀୟ ଖ୍ରୀଷ୍ଟିୟାନ I ସଂଖ୍ୟାରେ ବି ବହୁତ କମ I କିନ୍ତୁ ଆମ ଭିତରେ କାମୁଡ଼ା କାମୁଡି I ଟଣା ଟଣି ନୀତି ଯାଉନି I ମୁଁ ପ୍ରୋଟେଷ୍ଟାଣ୍ଡ I ସେ କ୍ୟାଥଲିକ I ଆମେ ପେଣ୍ଟିକୋଷ୍ଟାଲ l ସେମାନେ ଲୁଥରାନ I ସତେ ଯେମିତି ଆମ ଭିତରେ ସହନଶୀଳତା ନାହିଁ କି ଏକତା ବି ନାହିଁ I ମୋ ଚର୍ଚ୍ଚ I ମୋ ବିଶ୍ୱାସୀ ଭିତରେ କିଛି ପାଳକ ଆଉ ନେତା ସୀମିତ ହୋଇଯିବାକୁ ଚାହାନ୍ତି I ସେଥିପାଇଁ ବାହ୍ୟ ବଳ ଆସି ଆଇନ ଆଣି ଆମକୁ ଧରାଶାୟୀ କରିଦେଉଛି I ଯଦି ଆମେ ଏକାଠି ହୋଇଥାନ୍ତୁ ବାହ୍ୟବଳ ଯେତେ ମାରାତ୍ମକ ହେଲେ ବି ତାକୁ ପଙ୍ଗୁ କରିଦେଇ ହୁଅନ୍ତା I ପବନରେ ଫୁ କରିଦେଇ ହୁଅନ୍ତା I ଆମର ତ ଏକତା ନାହିଁ I ସେ ବଳ ମିଳିବ କେଉଁଠୁ I

ପ୍ରଥମଥର ଖ୍ରୀଷ୍ଟିୟାନ ଦିବସ ପାଳନ ହେଉଛି ଭାରତରେ I ଭାରି ଭଲ କଥା I ଲକଡାଉନ ଟିକେ କୋହଳ ହେଉଛି l ବ୍ୟାନର , ଲିଫଲେଟ ମରା ହେଉଛି l ଜୂମ ମିଟିଂ ରେ ସବୁ କାର୍ଯ୍ୟକ୍ରମ ଚାଲୁଛି I ଲୋକେ ଆଗ୍ରହ ପ୍ରକାଶ କରିଛନ୍ତି I ସମୟ ଦେଉଛନ୍ତି I ପଦକ୍ଷେପକୁ ସ୍ୱାଗତ କରିଛନ୍ତି I କିନ୍ତୁ ଅନେକଙ୍କ ପାଇଁ ତାହା ଅଜଣା ହୋଇଯାଇଛି I ସେମାନଙ୍କ ପାଖରେ ଆଗ୍ରହ ଅଛି ନା ଉତ୍ସାହ ଅଛି I କିଛି ଦେଖିବାକୁ ମିଳୁନି I ଆଶା ଅଛି ଆସନ୍ତା ବର୍ଷ ଜୁଲାଇ ୩ ତାରିଖ ପୁଣି ଆସିବ I ଲକଡାଉନ ନ ଥିବ I ସବୁ ଠିକ ଠାକ ଥିବ I ଦେଖିବାକୁ ମିଳିବ ଲୋକେ ରାସ୍ତାରେ ପ୍ଲା କାର୍ଡ ଧରିଥିବେ I ରାସ୍ତାରେ ପରିକ୍ରମା କରୁଥିବେ I ଗାଉଥିବେ ଯୀଶୁଙ୍କ ଗୀତ I କହୁଥିବେ ଯୀଶୁ ଭାରତୀୟଙ୍କୁ ପ୍ରେମ କରନ୍ତି I ତାଙ୍କ ପାଇଁ ଜୀବନ ଦେଇଛନ୍ତି I